Араван пробациясы өз кардарлары арасында экстремизмди алдын алуу боюнча иш алып барууда
Ош облусунун Араван району боюнча пробация органынын башкы адиси, мамлекеттик жарандык кызматтын 2-класстагы кеңешчиси А. А. Маткабылова жергиликтүү жалпыга маалымдоо каражаттарына билдирген маалыматка ылайык азыркы күндө Араван райондук пробация органында 62 кардар каттоодо турат.
Алардын ичинен 16 кардар дин менен байланыштуу кылмыш жасоо үчүн, башкача айтканда диний кастыкты (араздашууну) козутуу, жарандардын динге таандыктыгы боюнча бөтөнчөлүгүн, артыкчылыгын, же начардыгын пропагандалоо менен коштолгон экстремисттик материалдарды даярдоо, таратуу, анын ичинде интернет тарамы аркылуу да, ташуу же берип жиберүү, же болбосо жайылтуу максатында аларды сатып алуу же сактоо, ошого тете экстремисттик уюмдардын символикасын жана атрибутикасын пайдалануу үчүн соттолгон жарандар.
Алардын ичинен көпчүлүгү уюлдук телефондон одноклассник, фейсбук, инстаграм социалдык тармактарда өздөрүнүн профильдеринде экстремисттик көз караштагы аудио жана жазууларды жүктөп алып, сактап, же бөлүшкөн.
Айтылган материалдар соттук-комплекстик дин таануу жана лингвистика экспертизасынан өткөндө, ал аудиолордо Кыргыз Республикасынын аймагында тыюу салынган эл аралык экстремистик жана террористик уюмдарынын идеологиясына таандык үндөөлөр жана чакырыктар камтылгандыгы аныкталган.
2021-жылдын 20-майында Араван району боюнча Пробация органы, Араван райондук мамлекеттик администрациясынын башчысынын орун басары М. Мамасаидовдун катышуусунда пробация кардарларынын жалпы дин жөнүндө маалыматтарын кеңейтүүгө багытталган иш-чара өткөргөн.
Иш-чарага Араван районунун казысы Жусупов Алибек диний багыттар жөнүндө жана Кыргызстанда иш жүргүзүүгө тыюу салынган диний уюмдарды кантип таануу, экстремисттик жана террористтик топторго катышууга чакырууга каршы туруу, диний, экстремисттик жана террористтик мүнөздөгү кылмыштар үчүн жоопкерчилик тууралуу, ошондой эле террористтик уюмдарга жана секталарга тартуунун кесепеттери жөнүндө маалымат берди.
Өзгөчө жаштарды социалдык тармактарды колдоонууда абайлоону, түшүнүксүз диний жарыялоолорго көңүл бурбай, мессенджерлер аркылуу таратпоого чакырды.
Аңгемелешкен: З. КАРАТАЕВА, “Достук” гезитинин башкы редактору.
